26 يناير 2011

لإنجاح مسيرة ، ومكافحة بلطجة أمن دولة


* استخدام الإسبراي الأسود لتغطية عربيات أمن الدولة .
* سد الشكمانات الخاصة بعربيات الأمن بأي حاجة زي حتى قماش مثلاً . ده هيخليها توقف خلال ثواني .


* كل واحد يلبس نضارة بحر ، عشان الغازان أو القنابل المضيئة ، أو حتى لو كان فيه تفريق برش المية .
* كل واحد يلبس كمامة ، أو كوفية يغطي بيها فمه وأنفه .

** ايه هي مراكز الضعف في عربيات أمن الدولة ؟
- أولاً الشكمانات زي ما قولنا
- الزجاج الأمامي برده زي ما قولنا
- وكمان منافذ البنادق . ودي يتم استغلالها كالتالي :

أي واحد لابس جوانتي ، وعامل احتياطاته اللي اتفقنا عليها ، وياريت لو معاه حتى قماش مبلولة ويحطها على وشه ، يقدر يمسك القنبلة المسيلة للدموع ، أو قنبلة الغاز ويرميها جوه عربيات الأمن بس الأفضل انه يكون من مسافة قريبة علشان يتأكد انها مش هتأذي حد من المتظاهرين .


** طيب ازاي نتصرف مع القنابل المسيلة للدموع ونتجنب خطرها ؟
- أول وأهم حاجة واللي عنينا منها امبارح ... الهدوووووء ، لإنه أصلاً هدف القنابل دي هي بث الهلع في قلوب المتظاهرين ، احنا لو عملنا حسابنا واحتياطتنا القنابل دي مش هتأذينا .

- لو اترمت قنبلة قدامك ، والجو كله بقى دخانة ، استنفس ببطئ .
- لو استنشقت كتير من الغاز ، ابدأ مباشرةً بتنظيف أنفك ، واتمضمض بمية ، وكح كتير ، وخلي بالك متبلعش الغاز  .
- اعمل حسابك انك لازم يكون معاك عصير لمون أو خل عشان لو حصل هبوط ، أو دوخة أو أي حاجة ، ده هيساعد كتير .
- ممكن كمان تغسل وشك بالكوكاكولا عشان تزيل مفعول القنابل المسيلة للدموع ، هي بتحرق العين ، وبتخليها تدمع ، الكوكاكولا هتساعد ان الحالات دي تختفي وتريح العين .

** طيب لو استخدموا رصاص مطاطي ، نعمل ايه ؟
فيه عدة طرق لكده منها مثلاً :
الدروع البلاستيكية ، ممكن تكون صعبة شوية ، فإيه الأحسن وإيه اللي هيأدي برده ؟

استخدام أزايز بلاستيك .
ازاي ؟

نربط كذا ازازة مع بعض ونربطهم على ذراعنا كدروع للحماية .
ممكن كما نلفهم على ايدينا ، ووممكن على الصدر والبطن .


فـــــــــــــــــــــي الــــنـــــــــهـــــــــــايـــــــــــة
لو احنا عملنا كده ، يبقى كل اللي بتعمله قوات الأمن ملهوش لازمة ، غير بقى لو استخدموا رصاص حي . أنا قصدي إن ده هيحمي المظاهرات من انها تتفشكل بسبب هرع الناس وخوفهم زي ما حصل امبارح .

لازم طول الوقت منيأسش ، لازم نفتكر اننا راهنا انها هتكون ثورة

حاجة أخيرة .. انشروا في كل مكان . في كل مكاااااااااااااان

هناك تعليقان (2):

  1. ألف مبروك يامصر
    مبروك يا محمد ومبروك لكل مصري والحمدلله ع السلامة :)

    ردحذف
  2. الف مبروك لكل عربي .. أنا سعدت بالأمس سعادة جعلتني لم أعد مصدقاً أن الطاغية سقط .

    :)

    ردحذف